Тошкент, Ўзбекистон (UzDaily.uz) — АҚШнинг Глобал ҳамкорлик бўйича махсус вакили Паоло Замполли бугун Тошкентда Ўзбекистон миллий футбол терма жамоаси билан учрашди, деб хабар берди АҚШнинг республикадаги элчихонаси.

Президент Трамп номидан махсус вакил Замполли уларни 2026 йилда АҚШда бўлиб ўтадиган жаҳон чемпионатига тарихий йўлланма олгани билан табриклади.

Дипломатик миссия баёнотида қайд этилишича, 2026 йилги Жаҳон чемпионати нафақат бутун дунёни бирлаштиради, балки Американинг спорт менежменти, инновация ва меҳмондўстлик соҳаларидаги юксак даражасини ҳам намойиш этади.

Хусусан, Ўзбекистон терма жамоасининг мусобақага тайёргарлик кўришдаги саъй-ҳаракатлари ва фидойилиги юқори баҳоланмоқда.