Тошкент, Ўзбекистон (UzDaily.uz) — Англиянинг "Manchester City" клуби Франциянинг "Lans" жамоаси ҳимоячиси Абдуқодир Ҳусановни €50 миллионгача бўлган битим доирасида (бонуслар билан) сотиб олишга яқин турибди. Бу ҳақда Sky Germany журналисти Патрик Бергер хабар бермоқда.

20 ёшли Ўзбекистон терма жамоаси ҳимоячиси энг истиқболли ёш футболчилардан бири сифатида "шаҳарликлар"га ўтишга қизиқиш билдирмоқда.

Кутилишича, Ҳусановнинг трансфери "Manchester City"нинг 2025 йил январь ойидаги биринчи кучайтирилиши бўлади.

Пеп Гвардиола бошчилигидаги клуб Rú Días, Nathan Aké, John Stones ва Мануэл Аканжи каби асосий ҳимоячиларининг жароҳатлари сабабли мудофаани кучайтириш вариантларини изламоқда.

Гвардиоланинг сўзларига кўра, жамоа мустаҳкамлашга муҳтож ва Ҳусановнинг трансфери бу муаммони ҳал қилиши мумкин.

Манбаларга кўра, "Manchester City"нинг кейинги асосий трансфер мақсади Франкфуртнинг "Айнтрахт" клуби ҳужумчиси Омар Мармуш бўлади.

Эслатиб ўтамиз, Абдуқодир Ҳусанов 2023 йилда Белоруссиянинг "Энергетик-БГУ" клубидан "Ланс"га ўтган эди. У Лига 1да 31 та ўйин ўтказиб, Ўзбекистон терма жамоаси сафида 18 та ўйинда иштирок этиб, Европа футболида ўзини тезда намоён қилди.