Тошкент, Ўзбекистон (UzDaily.uz) — 25 сентябрдан бошлаб Ўзбекистон фуқаролари Иорданияга визасиз тарзда, 30 кунгача муддатга сафар қилиши мумкин бўлади. Бу ҳақда Ташқи ишлар вазирлиги матбуот котиби Ахрор Бурҳoнов маълум қилди.

Аввалроқ, 26 август куни Самарқандда Ўзбекистон Президенти Шавкат Мирзиёев ва Иордания қироли Абдулла II ибн ал-Ҳусайн ўртасида музокаралар ўтказилган эди. Учрашув якунида бир қатор ҳужжатлар, жумладан, визавий талабларни бекор қилиш бўйича келишув имзоланган.

ТИВ маълумотига кўра, мазкур келишув имзоланганидан 30 кун ўтиб кучга киради. Янги тартибга кўра, Иордания фуқаролари ҳам Ўзбекистонга визасиз келиши мумкин бўлади.

Аввалроқ ўзбекистонликлар Иордания визасини мамлакатга етиб боргач расмийлаштиришлари мумкин эди. Энди эса қироллик Ўзбекистон фуқаролари визасиз кириши мумкин бўлган 35-давлатдан бирига айланди.