Тошкент, Ўзбекистон (UzDaily.uz) — Тошкентнинг чет ҳудудида жойлашган 25 гектарлик ер майдони 3 январь куни E-auksion платформасида ўтказилган савдода 522 миллиард сўмга сотилди.

Мазкур майдон Мирзо-Улуғбек туманидаги «Алишеробод» маҳалласидан жой олган. Савдода жуда тез қарор қабул қилинди — атиги 10 дақиқа ичида Valid Trading компанияси томонидан битта ставка билан майдон сотиб олинди. Компания майдон учун 522,7 миллиард сўм таклиф қилди, бу бошланғич нархдан 5% юқори.

25,5 гектарлик ҳудуд янги қурилаётган «Тошкент-Шарқий» аэропорти қаршисида, Янги Ўзбекистон, Бинокор ва Жасорат кўчалари оралиғида жойлашган. Бу ерда 4-6 қаватли кўп қаватли уйлар, офислар, меҳмонхона мажмуалари, савдо ва маиший хизмат объектларини барпо этиш режалаштирилган. Майдон электр энергияси, сув ва газ таъминоти билан таъминланган.

Савдода ғолиб чиққан Valid Trading компанияси ер майдонини 49 йиллик ижара ҳуқуқи билан олади. Биринчи тўлов 15 иш куни ичида амалга оширилиши, қолган сумма эса уч йил давомида тўланиши шарт.

Valid Trading компанияси 2019 йилда Тошкент вилоятининг Зангиота туманида ташкил этилган бўлиб, улгуржи савдо фаолияти билан шуғулланади. Компаниянинг устав капитали 1,04 миллиард сўмни ташкил этади, ва унинг ягона таъсисчиси Ворис Абдувалиевдир. У, шунингдек, Gatter Group компаниясининг раҳбари ва шериклари Равшан Жамилов ҳамда Фатҳулла Содиқов билан бирга қўшма моликдир.