O‘zbekiston Markaziy Osiyoning IT-xabiga aylanmoqchi

Toshkent, O‘zbekiston (UzDaily.uz) — O‘zbekiston infratuzilmani rivojlantirish, biznesni qo‘llab-quvvatlash va sunʼiy intellekt texnologiyalarini joriy etish orqali Markaziy Osiyodagi yetakchi axborot texnologiyalari markaziga aylanishni maqsad qilgan. Bu haqda raqamli texnologiyalar vaziri Sherzod Shermatov chorshanba kuni bo‘lib o‘tgan chiqishida maʼlum qildi.

Bayonot Samarqand shahrida o‘tayotgan M360 Eurasia 2026 forumida yangradi. Vazir mamlakat IT-kompaniyalarni jalb qilish uchun shart-sharoitlarni izchil shakllantirayotganini, jumladan soliq imtiyozlari taqdim etilayotgani va biznesni tartibga solishning yangi tizimi ishlab chiqilayotganini taʼkidladi.

Shermatovning aytishicha, O‘zbekiston Jahon bankining GovTech yetuklik indeksida 9-o‘rinni egallab turibdi. Shuningdek, mamlakatda 2030 yilgacha mo‘ljallangan strategiya amalga oshirilayotgani qayd etildi. Ushbu strategiya byurokratik to‘siqlarni qisqartirish va biznes uchun maʼmuriy jarayonlarni optimallashtirishga qaratilgan.

Inson kapitalini rivojlantirishga ham alohida eʼtibor qaratilmoqda. Vazirning so‘zlariga ko‘ra, “Besh million sunʼiy intellekt yetakchilari” dasturi doirasida hozirga qadar 1 milliondan ortiq yosh mutaxassis tayyorlangan.