Toshkent, O‘zbekiston (UzDaily.uz) — Bugungi kunda mamlakatimizda tibbiy va sog‘lomlashtirish turizmi imkoniyatlaridan samarali foydalanilmoqda. Tibbiy turizm klasterlari va mehmonxona tipidagi zamonaviy sanatoriylar faoliyati yo‘lga qo‘yilgan. Bu maskanlar nafaqat sog‘likni tiklash, balki xorijiy turistlar uchun tibbiy turizm yo‘nalishida muhim rol o‘ynaydi.

Mazkur yo‘nalishda amalga oshirilgan ishlar bilan yaqindan tanishish maqsadida Jizzax viloyatining Zomin tumanida faoliyat olib borayotgan sog‘lomlashtirish maskanlariga OAV vakillari va blogerlar ishtirokida info tur o‘tkazildi.

Tashkil etilgan info tur davomida ishtirokchilar Zomin Milliy tabiat bog‘ida joylashgan “Azim Zomin Shifo” va “Zomin NKMK” sog‘lomlashtirish maskanlariga tashrif buyurdi.

Tashrif doirasida OAV vakillari sog‘lomlashtirish maskanlarida bemorlar uchun yaratilgan sharoitlar va zamonaviy davolash diagnostika bazasi mavjudligi, bemorlar yurak qon tomir tizimi, nafas olish organlari, asab tizimi, tanani sog‘lomlashtirish bo‘yicha davolanayotgani to‘g‘risida ma’lumot olishdi.

Sog‘lomlashtirish maskanlarida davolanayotgan Qozog‘iston, Qirg‘iziston, Tojikiston, BAA, Germaniya, Pokiston kabi davlatlardan kelgan mehmonlar nafaqat o‘z sog‘lig‘ini tiklash uchun balki Zomin tumani bo‘ylab sayohatlar qilish istagida kelganliklarini aytib o‘tdilar.