Toshkent, O‘zbekiston (UzDaily.uz) — O‘zbekiston Yo‘l harakati xavfsizligi xizmati davlat tizimi bilan Road24 mobil ilovasi o‘rtasida jarimalar haqida maʼlumot almashish to‘xtatilganini maʼlum qildi.

Haydovchilarga Safe Road YHXX ilovasidan foydalanish tavsiya etildi. Bu orqali ro‘yxatdan o‘tib, jarimalarni bevosita tekshirish mumkin bo‘ladi.

Road24 jamoasi esa o‘z ilovasi odatdagi tartibda ishlayotganini bildirdi. Chop etilgan bayonotda ishlab chiqaruvchilar davlat idoralarining harakatlarini tanqid qilib, bu vaziyatni raqobatsiz amaliyotga qiyosladi.

«Ilova o‘chirildi deb yozishyapti, lekin hammasi odatdagi tartibda ishlayapti. Nima yangilik qilindi? Road24‘ni olib, shunchaki ko‘chirib qo‘yishdi. Bizning jamoa innovatsiya yaratishni biladi», — deyiladi bayonotda.

Ishlab chiqaruvchilar, shuningdek, yaqin vaqtda ilovaning yangilanishi va unga yangi funksiyalar qo‘shilishi haqida maʼlum qildi.

Bundan tashqari, murojaatda IIV va Bosh YHXBQqa nisbatan tanqidlar bildirildi:

«Davlat tashkilotlari sifatida barchaga teng imkoniyat yaratib berish o‘rniga, kimning aloqasi va qarindoshi kuchli bo‘lsa, o‘shaga yo‘l berishyapti. Eski zamon qaytdi», — deb yozgan Road24 ishlab chiqaruvchilari.