Toshkent, O‘zbekiston (UzDaily.uz) — 8-10 avgust kunlari Xivada Turizm qo‘mitasi va Xorazm viloyati hokimligi tomonidan tashkil etilgan yorqin gastronomik va madaniy tadbir "Qovun sayli - 2025" festivali o‘tkazilmoqda.

Bu bayram qovunchilik, hunarmandchilik va turizm an’analarini o‘zida mujassam etgan. Tadbirning asosiy maydonlari – “Ichan-qal’a” tarixiy majmuasi va “Arda Xiva” zamonaviy sayyohlik markazi - shirin qovunlar hidi, xalq qo‘shiqlari, teatrlashtirilgan tomoshalar va yarmarkalar bilan to‘lib-toshmoqda.

19 ta stendda Xorazm viloyatining tumanlari, ilg‘or fermer xo‘jaliklari va boshqa ishtirokchilar o‘nlab qovun navlari, o‘z mahsulotlari, texnologiyalari hamda yutuqlarini namoyish etmoqda. Eng yaxshilari mukofot va sovrinlar bilan taqdirlanadilar. Mehmonlar qovunlarni tatib ko‘rish, ishlab chiqaruvchilar bilan suhbatlashish va mintaqaning qishloq xo‘jaligi an’analari haqida ko‘proq ma’lumot olish imkoniyatiga ega bo‘lmoqdalar.

Festival degustatsiya va ko‘rgazmalardan tashqari, boy madaniy dastur ham taqdim etmoqda: folklor jamoalarining chiqishlari, milliy taomlar tayyorlash bo‘yicha mahorat darslari, hunarmandchilik yarmarkalari va xalq o‘yinlari o‘tkazilmoqda. Ochiq havoda o‘tkazilayotgan an’anaviy sport musobaqalari va pazandachilik namoyishlari tomoshabinlarda alohida qiziqish uyg‘otmoqda.

Mehmonlarni O‘zbekiston va boshqa mamlakatlardan kelgan mashhur san’atkorlar ishtirokidagi unutilmas konsertlar kutmoqda. Dasturda DJ Endigo, afsonaviy Tohir Sodiqov, taniqli xonanda JONY hamda boshqa iste’dodli musiqachilarning chiqishlari o‘rin olgan.

Festival nafaqat Xorazm viloyatining sayyohlik va qishloq xo‘jaligi salohiyatini namoyon etmoqda, balki bayram kayfiyatini yaratib, tobora ko‘proq mahalliy va xorijiy sayyohlarni o‘ziga jalb qilmoqda.