Tojikiston–O‘zbekiston narkotrafik kanaliga chek qo‘yildi

Toshkent, O‘zbekiston (UzDaily.uz) — Ikki davlat huquqni muhofaza qiluvchi organlari Tojikiston — Qirg‘iziston — O‘zbekiston yo‘nalishi bo‘yicha giyohvand moddalarni yetkazib berish va noqonuniy muomalaga kiritish bilan bog‘liq xalqaro kanal faoliyatiga chek qo‘ydi.

Tezkor tadbirlar davomida IIV xodimlari 33 yoshli erkak keyinchalik sotish maqsadida Tojikistondan Qirg‘iziston hududiga ayniqsa yirik miqdorda gashishni noqonuniy olib kirishni tashkil etganini aniqladi.

Gumonlanuvchi giyohvand moddalarni sotishga urinish vaqtida qo‘lga olindi. Tintuv jarayonida uning o‘zida va avtomobilida o‘ziga xos hidga ega modda solingan umumiy og‘irligi taxminan 3 kg bo‘lgan uchta o‘ram topildi.

Keyinchalik ushlangan shaxsning yashash joyida o‘tkazilgan tintuv vaqtida yana 31 ta shunga o‘xshash o‘ram aniqlandi. Qo‘shimcha musodara qilingan giyohvand moddalarning umumiy og‘irligi 31 kg 398 grammni tashkil etdi. Shu tariqa, musodara qilingan moddalarning umumiy hajmi 34 kg 448 grammga yetdi.

Shundan so‘ng tezkor tadbirlar O‘zbekiston hududida ham o‘tkazildi. Unda IIV xodimlari 14 kg gashish va 1 kg opiyni musodara qildi. Shuningdek, mazkur narkotrafik kanaliga aloqadorlikda gumon qilinayotgan 31 yoshli X.T. ismli fuqaro ham qo‘lga olindi.

Hozirda huquqni muhofaza qiluvchi organlar ishning barcha holatlari va jinoiy sxemada ishtirok etgan bo‘lishi mumkin bo‘lgan shaxslarni aniqlash ishlarini davom ettirmoqda.