Sudanda harbiy samolyot qulashi natijasida kamida 45 kishi halok bo‘ldi

Toshkent, O‘zbekiston (UzDaily.uz) — Sudanning Omdurman shahrida harbiy samolyot qulashi oqibatida kamida 45 kishi halok bo‘ldi. Bu haqda Al Arabiya telekanali xabar bermoqda.

Dastlabki maʼlumotlarga ko‘ra, fojiaga havo kemasidagi texnik nosozlik sabab bo‘lgan. Samolyot parvozdan ko‘p o‘tmay qulagan va turar-joy uyiga tushgan. Natijada, faqatgina bortda bo‘lgan harbiylar va ekipaj aʼzolari emas, balki vayron bo‘lgan binoda bo‘lgan tinch aholi ham halok bo‘lgan.

Hodisa joyida qidiruv-qutqaruv ishlari davom etmoqda. Favqulodda holatlar xizmati xodimlari vayronalarni tozalayapti va jabrlanganlarga yordam ko‘rsatmoqda.

Manbalarga ko‘ra, halok bo‘lganlar orasida Xartum harbiy okrugining sobiq qo‘mondoni general Baxar Ahmed ham bor.

Sudan hukumati aviahalokatning aniq sabablarini aniqlash uchun tekshiruv o‘tkazmoqda.