Soliq qo‘mitasi 102,5 mlrd so‘mlik ijtimoiy keshbek to‘lovini to‘xtatdi

Toshkent, O‘zbekiston (UzDaily.uz) — Soliq qo‘mitasi soxta kassa cheklaridan foydalanish gumoni tufayli aprel oyi uchun 102,5 mlrd so‘m miqdoridagi ijtimoiy keshbek to‘lovlarini vaqtincha to‘xtatdi.

Idora maʼlumotlariga ko‘ra, shubhali xaridorlar reyestriga Yagona ijtimoiy himoya reyestridan 200 mingdan ortiq fuqaro kiritilgan. Qo‘mitada taʼkidlanishicha, mazkur fuqarolar shubhali operatsiyalar aniqlangan korxonalar tomonidan rasmiylashtirilgan cheklar asosida qo‘shilgan qiymat solig‘ini qaytarib olishga uringan.

Tekshiruvlar ijtimoiy keshbek tizimi doirasida o‘tkazilmoqda. Mazkur tizim ijtimoiy reyestrga kiritilgan fuqarolarga standart 1 foizli keshbek o‘rniga QQSni qaytarishni nazarda tutadi.

Hozirda 2025–2026 yillarda onlayn kassalar orqali 36,8 trln so‘mlik aylanmani amalga oshirgan 649 ta kompaniya faoliyati o‘rganilmoqda.

Soliq qo‘mitasi maʼlumotiga ko‘ra, tizim orqali o‘tgan cheklar asosida 771,1 ming nafar fuqaro umumiy hisobda 347,9 mlrd so‘m miqdorida to‘lov olgan.

Idora shuningdek Soliq ilovasi orqali faqat shaxsiy xaridlar va olingan xizmatlar uchun cheklarni ro‘yxatdan o‘tkazish zarurligini eslatdi. Fuqarolar ijtimoiy tarmoqlarda tarqatilayotgan yoki uchinchi shaxslar tomonidan berilgan cheklardan foydalanmaslikka chaqirildi.