Toshkent, O‘zbekiston (UzDaily.uz) — O‘zbekistonlik professional bokschi Shahram G‘iyosov (17–0, 10 KO) o‘zining WBA versiyasi bo‘yicha yarim o‘rta vazn (66,7 kg) chempionilik kamariga majburiy daʼvogar maqomini muvaffaqiyatli himoya qildi. U argentinalik Franko Maksimiliano Okamponi (17–3, 8 KO) Atlantik-Sitida (AQSH) 13 aprel kuni kechqurun bo‘lib o‘tgan jangda to‘rtinchi raundda texnik nokaut bilan mag‘lub etdi.

Jang ilk daqiqalardanoq keskin va kurashli tarzda o‘tdi: argentinalik raqib tempni buzish va qarshi hujumlar orqali kurashdi. Biroq, birinchi raund yakunida G‘iyosov aniq chap xuk zarbasi bilan Okamponi nokdaunga yubordi.

Ikkinchi va uchinchi raundlarda o‘zbekistonlik bokschi ehtiyotkorlik bilan harakat qildi, asosiy eʼtiborni korpusga zarbalar berishga qaratdi. Jangning yakuni to‘rtinchi raundda yuz berdi — G‘iyosov o‘ng qo‘li bilan jigarga yo‘llagan aniq zarbadan so‘ng Okampo tiz cho‘kdi va jangni davom ettira olmadi.

Bu g‘alaba bilan Shahram G‘iyosov nafaqat mag‘lubiyatsiz seriyasini saqlab qoldi, balki chempionlik jangiga yaqinlashdi. Endilikda uning navbatdagi raqibi Jaron Ennis (33–0, 29 KO) va Eymantas Stanyonis (15–0, 9 KO) o‘rtasidagi jang g‘olibi bo‘lishi kutilmoqda.

Ushbu g‘alabaga yana-da kuchli ruhiy taʼsir bergan voqea — jangga bir oy qolganida G‘iyosov o‘zining ikki yoshli qizini kamdan-kam uchraydigan miya kasalligi tufayli yo‘qotgani bo‘ldi. U Ring Magazine nashriga bergan intervyusida ko‘z yoshi bilan shunday dedi:

«Bu men uchun juda og‘ir bo‘ldi. Qizimdan ayrildim. U meni osmondan kuzatib turibdi, men uchun duo qilyapti. Men unga jahon chempioni bo‘lishimni vaʼda qilganman. Bu vaʼdamga albatta yetishaman. Bu jang — unga bag‘ishlangan.»

G‘iyosov g‘alabani jamoaviy mehnat va professional tayyorgarlik natijasi ekanini taʼkidlab o‘tdi. Taʼlim jarayonida ayniqsa korpusga zarbalar va kombinatsiyalar ustida ishlangani qayd etildi.

«Biz qattiq ishladik va bunga erishdik. Bu g‘alaba — qizim uchun. Keyingi qadam — jahon chempionilik kamari!» — dedi Shahram G‘iyosov.