Rossiyalik shifokorlar “Mehr missiyasi” bilan O‘zbekistonga keladi

Toshkent, O‘zbekiston (UzDaily.uz) — 8–13 sentyabr 2025 yil kunlari O‘zbekistonda xalqaro volontyorlik dasturi — “Mehr missiyasi”ning navbatdagi bosqichi o‘tkaziladi. Uning doirasida “RJD-Meditsina” klinikalari tarmog‘idan sakkiz nafar shifokor tibbiy va maslahat yordami ko‘rsatadi, shuningdek hamkasblari uchun taʼlimiy tadbirlar o‘tkazadi.

Delegatsiya tarkibida jarrohlar, yurak-qon tomir jarrohlari, urolog, akusher-ginekolog, endokrinolog va travmatolog-ortoped bor.

Har bir mutaxassis o‘z kasbiy yo‘nalishiga muvofiq ravishda Toshkent yoki Samarqanddagi belgilangan tibbiyot muassasasida ishlaydi.

Tashrif dasturiga master-klasslar, maʼruzalar, davra suhbatlari, klinik obxodlar, maslahatlar va bemorlarni ko‘rikdan o‘tkazish kiritilgan. Alohida eʼtibor o‘zbek hamkasblari bilan tajriba almashish va tibbiyot oliygohlari talabalarini o‘qitishga qaratilgan.

Bu “RJD-Meditsina” shifokorlarining O‘zbekistondagi ikkinchi missiyasi hisoblanadi. Bir yil oldin mutaxassislar Toshkentda bo‘lib, maslahatlar, maʼruzalar va yuqori texnologiyali jarrohlik operatsiyalarini o‘tkazgan edi. O‘shanda qatnashgan uch nafar shifokor bu safar ham delegatsiya tarkibida.

“Bir yil oldin biz hamkorlikda klinik obxodlar o‘tkazdik, eng murakkab holatlarni muhokama qildik va yuqori texnologiyali jarrohlik operatsiyalarini bajardik. Maʼruzalar, seminarlar va jonli munozaralar o‘zaro qiziqish va tajriba almashishga tayyorlikni tasdiqladi. Bugun biz boshlangan ishni davom ettirish, hamkorlikni mustahkamlash, taʼlim dasturlarini kengaytirish va bemorlar manfaati yo‘lida yangi qo‘shma loyihalarni amalga oshirish uchun qayta keldik”, — deya taʼkidladi professor, tibbiyot fanlari doktori, jarroh Vladislav Shirinskiy.

Xalqaro “Mehr missiyasi” dasturi 2021 yildan buyon Rossotrudnichestvo va “Dobro.RF” assotsiatsiyasi tomonidan amalga oshirilib kelmoqda. U sog‘liqni saqlash, taʼlim, madaniyat va ekologiya sohalarini qamrab olgan. Shu vaqtgacha 20 dan ziyod davlatda 43 ta missiya o‘tkazilib, 15 mingdan ortiq kishi yordam oldi.

2024 yilda “RJD-Meditsina” shifokorlari ikki marta missiyalarda qatnashdi — O‘zbekiston va Turkmanistonda.

Hozirda loyiha “RJD” OAJning xorijdagi gumanitar salohiyatni rivojlantirish konsepsiyasi doirasida amalga oshirilmoqda.

2025 yilda dasturning geografiyasi kengayib, MDH mamlakatlarini ham o‘z ichiga oladi.