Toshkent, O‘zbekiston (UzDaily.uz) — 2 mart kuni Qozog‘istonning Mangistau viloyati, Munayli tumani, Baskuduk qishlog‘ida xususiy uyda oila aʼzolarining gazdan zaharlanishi oqibatida fojea sodir bo‘ldi.

Hodisa joyiga yetib kelgan qutqaruvchilar va tez tibbiy yordam brigadalari uy ichida yetti nafar insonning jasadini topdi, ularning besh nafari yosh bolalar edi. Afsuski, barcha jabrlanuvchilar voqea joyida vafot etgan.

Mangistau viloyati favqulodda vaziyatlar departamentining dastlabki taxminiga ko‘ra, fojeaga gaz jihozlaridan noto‘g‘ri foydalanish sabab bo‘lgan. Rasmiy maʼlumotlarga ko‘ra, marhumlar O‘zbekiston fuqarolari bo‘lgan.

Hodisa sabablarini o‘rganish va tekshirish uchun Mangistau viloyati hokimi birinchi o‘rinbosari Yerbol Izbergenov rahbarligida maxsus komissiya tashkil etildi.

Vafot etganlarning yaqinlariga zarur moddiy va maʼnaviy yordam ko‘rsatiladi, jumladan, dafn marosimini tashkil etishda yordam beriladi.

Mazkur holat Mangistau viloyati hokimi shaxsiy nazorati ostida.