Toshkent, O‘zbekiston (UzDaily.uz) — Rossiya prezidenti Vladimir Putin Shanxay hamkorlik tashkiloti (SHHT) sammiti doirasida O‘zbekiston prezidenti Shavkat Mirziyoyev bilan uchrashuv o‘tkazishi kutilmoqda. Bu haqda Rossiya rahbarining yordamchisi Yuriy Ushakov maʼlum qildi.

RIA Novosti xabar berishicha, Putinning Xitoyga tashrifi 31 avgust — 3 sentyabr kunlariga rejalashtirilgan. Avvalo Rossiya prezidenti Tyanszin shahrida bo‘lib o‘tadigan SHHT sammitida ishtirok etadi, shundan so‘ng Pekinga rasmiy tashrif doirasidagi tadbirlarda qatnashish uchun yo‘l oladi.

Xitoy Xalq Respublikasi raisi Si Szinpin bilan muzokaralardan keyin, Vladimir Putin bir qator ikki tomonlama uchrashuvlar o‘tkazadi. Ular orasida Shavkat Mirziyoyev bilan muloqot ham bor.

Yuriy Ushakov taʼkidlashicha, muzokaralar asosan ikki tomonlama hamkorlik masalalari va mamlakatlar o‘rtasidagi sheriklik munosabatlarini rivojlantirishga qaratilgan bo‘ladi.