USAID O‘zbekistonda raqamlashtirishni tezlashtirish uchun 287 ayol bojxona xodimini o‘qitdi
Toshkent, O‘zbekiston (UzDaily.uz) — AQSHning xalqaro taraqqiyot agentligi (USAID) O‘zbekiston Bojxona qo‘mitasida faoliyat yuritayotgan ayol xodimlarni zamonaviy IT malakasiga ega qilish bo‘yicha o‘quv dasturini yakunladi. O‘quv jarayoni USAIDning Markaziy Osiyoda savdoni rivojlantirish dasturi doirasida IT akademiyasi hamkorligida tashkil etildi. Natijada 287 nafar bojxona xodimi zamonaviy raqamli kompetensiyalarni egalladi.
Dastur ishtirokchilarga raqamli texnologiyalarni o‘zlashtirish, ularni professional faoliyatda samarali qo‘llash, yetakchilik ko‘nikmalari va o‘z-o‘ziga ishonchni oshirish imkoniyatini yaratdi.
O‘quv jarayonida axborot tizimlarini boshqarish va ma’lumotlarni tahlil qilish vositalarini amalda qo‘llashga alohida e’tibor qaratildi. Bu bilimlar xodimlarga yaxshi qarorlar qabul qilish, bojxona jarayonlarining tezkorligini oshirish va chegaralari savdoni soddalashtirishga yordam beradi.
Sertifikatlar topshirish marosimida AQSHning O‘zbekistondagi elchixonasi muvaqqat ishonchli vakili Xezer Byorns bojxona tizimi modernizatsiyasida ayollarning ishtirokining ahamiyatini ta’kidladi:
«Ayol mutaxassislar bojxona xizmati kelajagiga katta ta’sir ko‘rsatmoqda, yosh yetakchilar avlodini ilhomlantirib, innovatsion yondashuv va boshqaruvning namunasini ko‘rsatmoqda. AQSH raqamlashtirish, iqtisodiy o‘sish va xavfsizlikni rivojlantirishga o‘z hissasini qo‘shishdan faxrlanadi va "Raqamli O‘zbekiston 2030" strategiyasini qo‘llab-quvvatlaydi».
Mazkur o‘quv dasturi Bojxona qo‘mitasi xodimlarining kasbiy tayyorgarligini oshirish, ularning texnik ko‘nikmalarini rivojlantirish va tez o‘zgaruvchi raqamli muhitga moslashuvchanlikni ta’minlashda muhim o‘rin tutdi.
O‘zbekistonda bojxona jarayonlarining raqamlashtirilishi xalqaro savdoni tezlashtirish, inson omili bilan bog‘liq xatolarni minimallashtirish va korrupsiya xavfini kamaytirishga ko‘maklashadi. Ayollarning IT sohasida malakasini oshirish davlat sektorida gender tengligini mustahkamlashga hissa qo‘shadi, bu esa mamlakatning barqaror rivojlanishi uchun muhim qadam hisoblanadi.