Toshkent, O‘zbekiston (UzDaily.uz) — Toshkentdagi 7-sonli jazoni ijro etish koloniyasi mahkumi Mustafo Tursinboyev devor vayron bo‘lishi oqibatida halok bo‘ldi. Bu haqda O‘zbekiston Bosh prokuraturasi matbuot xizmati xabar berdi.

11 fevral kuni bir qavatli binoni demontaj qilish vaqtida Tursinboyev qulagan devor ostida qolgan. U shu zahotiyoq shifoxonaga yetkazilgan, ammo ko‘rsatilgan tibbiy yordamga qaramay, 16 fevral kuni vafot etgan.

Hodisa bo‘yicha O‘zbekiston Jinoyat kodeksining 257-moddasi (Mehnat muhofazasi qoidalarini buzish) asosida jinoyat ishi qo‘zg‘atilgan. Mazkur modda bo‘yicha 2 yildan 5 yilgacha ozodlikni cheklash yoki 5 yilgacha ozodlikdan mahrum qilish jazosi belgilangan.

Tergov harakatlarini Toshkent shahar maxsus prokuraturasi olib bormoqda.