O‘zbekistonning yoshlar terma jamoasi Chilida yana g‘alaba qozondi

Toshkent, O‘zbekiston (UzDaily.uz) — O‘zbekiston yoshlar terma jamoasi yana bir bor Chili tengdoshlari ustidan ustunlikni namoyish etdi va ketma-ket ikkinchi o‘rtoqlik uchrashuvida g‘alaba qozondi.

Chili hududida bo‘lib o‘tgan uchrashuv 2:1 hisobi bilan Osiyo chempionlari foydasiga yakunlandi. Uyushqoq o‘yin namoyish etgan o‘zbekistonlik futbolchilar uchrashuvning 10-daqiqasida Sadriddin Hasanovning goli orqali hisobni ochishdi. 60-daqiqada esa Azizbek Abdumo‘minov ikkinchi golni urdi va mehmonlar afzalligini ikki barobar oshirdi.

Mezbonlar 78-daqiqada Maksimo Espinolaning goli orqali hisobdagi farqni qisqartirishga muvaffaq bo‘lishdi, ammo bu ularni mag‘lubiyatdan saqlab qolmadi.

Eslatib o‘tamiz, ikki jamoa o‘rtasidagi avvalgi o‘yinda ham O‘zbekiston terma jamoasi 1:0 hisobida g‘alaba qozongan edi.