Toshkent, O‘zbekiston (UzDaily.uz) — O‘zbekistonda Uzum Market, Olcha va Glotr yirik onlayn platformalari faoliyati monitoringi o‘tkazildi, uning natijasida 300 ga yaqin turdagi kontrafakt mahsulotlar aniqlandi. Bu haqda Adliya vazirligi xabar berdi.

Monitoring natijalariga ko‘ra:

Uzum Marketda 220 ga yaqin, Glotr va Olchada esa 50 ga yaqin kontrafakt mahsulotlar savdoga taklif etilayotganligi aniqlandi.

Kontrafakt mahsulotlar asosan kiyim-kechak, kosmetika vositalari hamda maishiy texnikalarda ko‘proq uchramoqda. Mashhur brendlar – “Puma”, “Lacoste”, “Adidas”, “Chanel”, “Eclat”, “Gucci”, “Samsung”, “Bosch” kabi tovar belgilari bilan ishlab chiqarilgan mahsulotlar sotuvga taklif etilmoqda.

Aniqlangan holatlar bo‘yicha huquq egalarining murojaatlariga asosan “Uzum Market” onlayn marketpleysidan ba’zi kontrafakt mahsulotlarning savdosiga chek qo‘yildi va ular olib tashlandi.