Toshkent, O‘zbekiston (UzDaily.uz) — Farg‘ona viloyatida smart-kartalar va noutbuklar ishlab chiqarishga ixtisoslashgan yangi zamonaviy korxonaning qurilish ishlari yakunlanmoqda.

Shunday loyihalardan biri Xitoyning “Oman-China Investment” kompaniyasi bilan hamkorlikda amalga oshirilayotgan loyihadir.

Mazkur loyiha doirasida Farg’ona viloyatida zamonaviy smart-kartalar va noutbuklar ishlab chiqaruvchi yangi korxona tashkil etiladi.

“O’zeltexsanoat” uyushmasi mas’ul xodimlari “Oman-China Investment” kompaniyasi vakili Su Yuhang bilan ushbu loyihaning tadbiq etilish jarayoni muhokamasiga bag’ishlangan navbatdagi uchrashuvni tashkil etdilar.

Uchrashuvda kompaniya vakili tomonidan korxona qurilishining yakuniy bosqichi ketayotganligi, ishlab chiqarish liniyalari uchun texnologik uskunalar xarid qilish rejalashtirilayotganligi ma’lum qilindi.

Uyushma mas’ullari tomonidan ushbu korxonaning qurilishi va zamonaviy texnologiyalar bilan ta’minlanishi uchun xorijdan import qilishda imtiyozlar qo’llanilishi va sertifikatlashtirish masalalari doirasida uyushma tomonidan amaliy yordam ko’rsatilishi bildirildi.

Bugungi kunda ushbu xorijiy kompaniya tomonidan nafaqat import o’rnini bosuvchi ishlab chiqarishni yo’lga qo’yish, qolaversa ta’lim sohasida ham bir qator ishlar amalga oshirilmoqda.

Jumladan, joriy yilda Nukus shahrida xalqaro universitet ochilgan bo’lib, kelgusi yilda Farg’ona shahrida ham xalqaro universitet va maktab ochilishi reja qilingan.

Uchrashuvda tomonlar yuqoridagi masalalar bo’yicha hamkorlik qilishda tegishli ishlarni olib borishga kelishib oldilar.