Toshkent, O‘zbekiston (UzDaily.uz) — O‘zbekistonning har bir hududida ichimlik suvi sifatini tekshirish uchun markaziy laboratoriyalar tashkil etilishi rejalashtirilmoqda.

Mazkur tashabbus 2025-yil uchun mo‘ljallangan davlat dasturi loyihasi doirasida kiritilgan bo‘lib, u atrof-muhitni muhofaza qilish va yashil iqtisodiyotni rivojlantirishga yo‘naltirilgan.

Laboratoriyalar bevosita yoki sanitariya-epidemiologik osoyishtalik va jamoat salomatligi hududiy bo‘limlari bilan shartnoma asosida faoliyat yuritishi kutilmoqda.

Barcha yangi laboratoriyalar belgilangan texnik talablar asosida jihozlanadi.

Ushbu dastur ijrosi "O‘zsuvta’minot" AJ zimmasiga yuklatilgan.

Tashabbusning asosiy maqsadi — mamlakat bo‘ylab ichimlik suvi sifatini nazorat qilish tizimini yaxshilash.