Toshkent, O‘zbekiston (UzDaily.uz) — Londonda bo‘lib o‘tgan Jahon taʼlim forumi doirasida O‘zbekiston Maktabgacha va maktab taʼlimi vaziri Xilola Umarova rahbarligida delegatsiyasi, mamlakatda umumiy taʼlim tizimini rivojlantirishga qaratilgan bir qator muhim kelishuvlarni imzoladi.

Volunteers Services Overseas (VSO) tashkiloti bilan tuzilgan kelishuvga ko‘ra, 500 nafardan ortiq britanlik o‘qituvchi O‘zbekistondagi umumtaʼlim maktablarida dars berish uchun jalb etiladi. Bu tashabbus ingliz tilini o‘qitish sifatini oshirish va ilg‘or pedagogik amaliyotlarni joriy etishga qaratilgan.

Tashrif doirasida vazir Islamiy taʼlim, fan va madaniyat tashkiloti (ICESCO) bosh direktori Salim al-Malik bilan uchrashuv o‘tkazdi. Suhbat chog‘ida ikki tomonlama hamkorlik istiqbollari va qo‘shma taʼlim masalalariga bag‘ishlangan xalqaro konferensiya o‘tkazish imkoniyatlari muhokama qilindi.

Shuningdek, Cambridge University Press & Assessment bilan O‘zbekiston Milliy pedagogika universiteti (Nizomiy nomidagi)ni transformatsiya qilish bo‘yicha strategik hamkorlik to‘g‘risida kelishuv imzolandi. Ushbu tashabbus o‘qituvchilarni tayyorlash dasturlarini modernizatsiya qilish va xalqaro taʼlim standartlarini joriy etishga qaratilgan.

Forum doirasidagi muhim voqealardan biri — vazir Xilola Umarovaning Buyuk Britaniyadagi yetakchi oliy o‘quv yurtlarida tahsil olayotgan "El-yurt umidi" jamg‘armasi stipendiatlari bilan uchrashuvi bo‘ldi. Uchrashuv O‘zbekistonning Londondgi elchixonasida o‘tkazildi va u yosh mutaxassislarning Vatanga qaytishi va mamlakat taʼlim tizimini rivojlantirishdagi kelajakdagi hissasiga bag‘ishlandi.