Toshkent, O‘zbekiston (UzDaily.uz) — O‘zbekiston fuqarolari uchun yana bir eshik ochildi – Bolgariya kabi Yevropaning taraqqiy etgan davlatida rasman va qonuniy ishlash imkoniyati kun tartibida.

Migratsiya agentligi rahbari Behzod Musayev va Bolgariya Respublikasi Parlamentining, mehnat va ijtimoiy siyosat qo‘mitasi raisi Denitsa Sacheva xonim o‘rtasida rasmiy uchrashuv bo‘lib o‘tdi.

Unda mehnat migratsiyasi, ishchi kuchini tayyorlash va fuqarolarni huquqiy himoya qilish kabi muhim masalalar muhokama qilindi.

Bolgar ish beruvchilari o‘zbekistonliklarni intizomli, moslashuvchan va masʼuliyatli deb baholadi.

Bolgariya tomoni turli iqtisodiyot tarmoqlarida faoliyat yuritayotgan o‘zbekistonlik fuqarolarning mehnat intizomi, moslashuvchanligi va masʼuliyatini yuqori baholadi.

Hozirgi kunda tomonlar quyidagilarni nazarda tutuvchi ikki tomonlama davlatlararo kelishuvni tayyorlash ustida faol ish olib bormoqda:

– O‘zbekiston fuqarolari uchun rasmiy va himoyalangan mehnat faoliyati shaklini taʼminlash;
– Vakolatli agentlik orqali yuboriladigan mehnat migrantlari uchun huquqiy va ijtimoiy himoya kafolatlari;
– Xorijda ishchilarning muvaffaqiyatli moslashuvi uchun moliyaviy qo‘llab-quvvatlash choralari.

Bolgariya Ichki ishlar vazirining o‘rinbosari Lyubomir Yosifov bilan uchrashuvda mehnat migratsiyasini tartibga solish mexanizmlarini takomillashtirish, O‘zbekiston fuqarolari uchun shart-sharoitlarni yaxshilash va maʼmuriy jarayonlarni soddalashtirish masalalariga alohida eʼtibor qaratildi. Xususan, ishchi vizalarni berish jarayonini tezlashtirish va hujjatlarni rasmiylashtirish muddatlarini qisqartirish zarurligi taʼkidlandi.

Bolgariya tomoni qo‘shma ishchi guruh tuzish tashabbusini qo‘llab-quvvatladi va tizimli hamda o‘zaro manfaatli hamkorlikka tayyorligini bildirdi. Shu bilan birga, hozircha to‘liq amalga oshirilmagan davlatlararo kelishuv mehnat migrantlarining huquqiy himoyasi imkoniyatlarini cheklayotgani qayd etildi va bu bo‘shliqni yaqin vaqtda bartaraf etish zarurligi taʼkidlandi.

Mehnat bozoridagi ishchi kuchiga bo‘lgan katta ehtiyoj ushbu hamkorlikning dolzarbligini yana-da oshirmoqda. Bolgariya Sanoat kapitali assotsiatsiyasi kuzatuv kengashi raisi Rumen Radev maʼlum qilishicha, qurilish, qishloq xo‘jaligi, mehmonxona va restoran biznesi kabi sohalarda hozirgi kunda 80 mingdan ziyod bo‘sh ish o‘rinlari mavjud.

"Bolgariya ish beruvchilarining fikriga ko‘ra, O‘zbekistondan kelgan fuqarolar o‘zining mehnatsevarligi, qonuniy talablarga qatʼiy rioya qilishi, yuqori tarbiyasi bilan bolgar xalqi orasida yuqori hurmatga ega" , - deya taʼkidladi Bolgariya Sanoat Kapitali Assotsiatsiyasi direktorlar kengashi raisi Rumen Radev.

Shunday qilib, ushbu tashabbus O‘zbekiston fuqarolari uchun xavfsiz, tashkil etilgan va uzoq muddatli mehnat faoliyatini taʼminlash uchun ishonchli asos yaratmoqda hamda Yevropa Ittifoqi mamlakatlarida iqtisodiy va ijtimoiy integratsiya uchun haqiqiy imkoniyatlar ochmoqda.