Toshkent, O‘zbekiston (UzDaily.uz) — O‘zbekiston tashqi ishlar vaziri Baxtiyor Saidov ASEAN Bosh kotibi Kao Kim Xorn bilan uchrashdi.

Muzokaralar chog‘ida tomonlar Markaziy Osiyo va ASEAN o‘rtasidagi hamkorlikni mustahkamlash va kengaytirish muhimligini taʼkidlab, o‘zaro hamkorlikni asosiy sohalarda chuqurlashtirish masalalariga eʼtibor qaratdilar.

«Biz muhokama qilgan masalalar keng qamrovli bo‘lib, mintaqaviy rivojlanish, mamlakatlarimiz o‘rtasidagi ikki tomonlama aloqalarni mustahkamlash hamda savdo, xavfsizlik va barqaror o‘sish kabi sohalarda yangi hamkorlik imkoniyatlarini izlashni o‘z ichiga oldi», — dedi Baxtiyor Saidov.

O‘zbekiston tashqi siyosat idorasi rahbari tomonlar mavjud imkoniyatlardan samarali foydalanish va dolzarb muammolarni birgalikda hal etish uchun yaqin hamkorlik zarurligi bo‘yicha yagona fikrga kelishganini taʼkidladi.

«Aniqki, hamkorlikni yana-da rivojlantirish hududlarimiz farovonligi va barqarorligining garovi bo‘ladi», — dedi Baxtiyor Saidov.