Toshkent, O‘zbekiston (UzDaily.uz) — O‘zbekiston milliy xokkey terma jamoasi Jahon chempionatida muvaffaqiyatli start qilib, Kuvayt jamoasini 13:3 hisobi bilan mag‘lub etdi.

O‘yinda ayniqsa Vadim Kravchenko va Salohiddin Azimov ajralib turdi — har ikkisi xat-trik qayd etdi. Artyom Malsev esa raqib darvozasiga ikki marta shayba kiritib, g‘alabaga katta hissa qo‘shdi. Shuningdek, Ilya Nazarevich, Pavel Sinyavskiy, Jasurbek Rustamxonov, Javohir Rasulov va Daniel Kogan ham aniq zarbalar bilan o‘z nomlarini snayperlar ro‘yxatiga yozdirishdi.

Bu ishonchli g‘alaba O‘zbekiston terma jamoasiga turnirning qolgan o‘yinlariga ishonch va yuqori kayfiyat bilan tayyorgarlik ko‘rish imkonini beradi.