Toshkent, O‘zbekiston (UzDaily.uz) — O‘zbekiston Savdo-sanoat palatasi raisining birinchi o‘rinbosari Davronbek Qurbonov rahbarligidagi delegatsiya Vena shahrida xizmat safari doirasida Avstriya Iqtisodiy palatasining Osiyo davlatlari bilan ishlash departamenti direktori Stefan Stanteyskiy bilan uchrashuv o‘tkazdi.

Avstriya Iqtisodiy palatasi 1839 yilda tashkil etilgan bo‘lib, mamlakatda faoliyat yuritadigan barcha tadbirkorlik subyektlari unga majburiy ravishda aʼzo hisoblanadi.

Bugungi kunda palatada 600 mingdan ortiq tadbirkorlik subyektlari ro‘yxatdan o‘tgan, ularning yillik tovar aylanmasi esa 521 mlrd AQSH dollarini tashkil etadi.

Tashkilot dunyoning 100 dan ziyod davlatlarida savdo vakolatxonalariga ega va 2024 yilda O‘zbekistonda ham o‘z vakolatxonasini ochgan.

Uchrashuvda ikki tomonlama hamkorlikni yangi bosqichga olib chiqish masalalari muhokama qilindi. Xususan, Stefan Stanteyskiy tomonidan Avstriyada O‘zbekiston Savdo-sanoat palatasi vakolatxonasini ochish hamda Vena shahrida O‘zbekiston–Avstriya biznes forumini o‘tkazish taklifi ilgari surildi.

Shuningdek, iqtisodiyot, savdo va investitsiya aloqalarini yana-da rivojlantirish, startap loyihalarini birgalikda amalga oshirish hamkorlikning istiqbolli yo‘nalishlari sifatida belgilab olindi.

Uchrashuv samimiy va ishonchli ruhda o‘tib, tomonlar belgilangan maqsadlarga erishish yo‘lida doimiy muloqot va amaliy hamkorlikni davom ettirishga kelishib oldilar.