Toshkent, O‘zbekiston (UzDaily.uz) — O‘zbekiston Respublikasi Prezidenti Shavkat Mirziyoyev Rossiya bilan qo‘shma kino ishlab chiqarish to‘g‘risidagi xalqaro kelishuvni ratifikatsiya qiluvchi qarorni imzoladi.

Hujjat ikki davlat o‘rtasida qo‘shma filmlar yaratish va prokat qilish sohasida hamkorlikni tartibga soladi. Shuningdek, o‘zbek-rus qo‘shma kinolentalariga milliy filmlar bilan bir xil imtiyozlar va preferensiyalar taqdim etish ko‘zda tutilgan.

Tomonlar qo‘shma filmlarni kinofestivallar va tanlovlarda hamkorlikda ilgari surishga kelishib oldilar. Kelishuvga ko‘ra, kinokartinalar albatta rus yoki o‘zbek tiliga dublyaj qilinadi. Shuningdek, suratga olish guruhlarining kirish-chiqish jarayonlari va uskunalarning tashilishi soddalashtirilishi belgilangan.

Ushbu kelishuv 2024 yil 27 may kuni imzolangan. Uning amalga oshirilishi uchun masʼul etib O‘zbekiston Respublikasi Madaniyat vazirligi tayinlangan.