Toshkent, O‘zbekiston (UzDaily.uz) — 2024-yil 27 noyabr kuni O‘zbekiston Prezidenti Shavkat Mirziyoyev “Temir yo‘l transporti to‘g‘risida”gi qonunning yangi tahririni imzoladi.

Qonunning yangi tahririda “temir yo‘l transporti” tushunchasiga o‘zgartirishlar kiritildi va u endi umumiy foydalanishdagi va umumiy foydalanishda bo‘lmagan transportga ajratiladi.

Umumiy foydalanishdagi temir yo‘l infratuzilmasidan foydalanish va infratuzilma operatorining faoliyati bo‘yicha yangi qoidalar belgilandi, shuningdek, tashuvchilarning huquq va majburiyatlari aniqlab qo‘yildi.

Qonun temir yo‘lda yuk tashish va yo‘lovchilar tashish tariflarini tartibga soladi. Tariflar endilikda bozor tamoyillari asosida shakllantiriladi, yuk vagonlarini taqdim etish va tezkor hamda yuqori tezlikdagi poyezdlarda yo‘lovchilarni tashish bo‘yicha xizmatlar uchun davlat tomonidan tartibga solishdan voz kechiladi.

Shuningdek, tariflarni bozor tamoyillari asosida tartibga solishning yangi mexanizmi joriy etilmoqda.

Qonun davlat byudjeti hisobidan ichki yo‘nalishlarda yo‘lovchilarni tashish xizmatlari bilan bog‘liq zararlarni qoplashni nazarda tutadi. Bunda yuqori tezlikdagi va tezkor poyezdlar istisno qilinadi.

Hujjat temir yo‘l infratuzilmasini rivojlantirish uchun investitsiyalarni jalb etish yo‘nalishlarini belgilaydi, shuningdek, umumiy va umumiy foydalanishda bo‘lmagan temir yo‘llar hamda vokzallarni qurish va rekonstruksiya qilish uchun moliyalashtirish manbalarini aniqlaydi.

Shuningdek, temir yo‘l sohasida davlat-xususiy sheriklik asosida loyihalarni amalga oshirish shartlari nazarda tutilgan. Bunda Vazirlar Mahkamasi, Transport vazirligi va Transport inspeksiyasi o‘rtasida vakolatlar aniq taqsimlangan.

Qonun temir yo‘l transportida raqobat muhitini yaratish, fuqarolarga xizmat ko‘rsatish sifatini oshirish, yo‘lovchilar va yuklarni xavfsiz tashishni ta’minlash, shuningdek, xalqaro hamkorlikni rivojlantirishga qaratilgan.

Qonun 2025-yil 1-yanvardan kuchga kiradi, ammo uning ko‘pchilik normalari (zararlarni qoplash va chegirmalar bilan bog‘liq qismi istisno qilingan holda) 2025-yil 29-maydan — e’lon qilinganidan 6 oy o‘tgach amal qila boshlaydi.