Toshkent, O‘zbekiston (UzDaily.uz) — O‘zbekiston Markaziy banki rahbariyati Janubiy Koreyaning Shinhan banki vakillari bilan uchrashuv o‘tkazdi. Tashrif buyurgan delegatsiyaga bankning global biznesni rivojlantirish boshqarmasi rahbari Kim Jiyong boshchilik qildi.

Muzokaralar davomida Shinhan Bank vakillari so‘nggi yillardagi faoliyatlariga doir sharh berib, O‘zbekiston bank bozorida o‘z ishtirokini kengaytirish va pozitsiyasini mustahkamlash bo‘yicha rejalari haqida maʼlumot berdi.

O‘z navbatida, Markaziy bank mutaxassislari mehmonlarni O‘zbekistonda bank ochish tartib-qoidalari, shuningdek, mamlakat qonunchiligida belgilangan talablar bilan tanishtirdi.

Shuningdek, tomonlar mahalliy bozorda biznesni rivojlantirish istiqbollarini, jumladan, davlat banklarini xususiylashtirish masalalarini muhokama qildilar.