Toshkent, O‘zbekiston (UzDaily.uz) — 2025 yil 24 aprel kuni O‘zbekiston Respublikasi Markaziy banki asosiy foiz stavkasini o‘zgarishsiz — yillik 14,0% darajasida saqlab qolish to‘g‘risida qaror qabul qildi. Bu qaror inflyatsion jarayonlardagi noaniqlik saqlanayotgani va qatʼiy pul-kredit sharoitlarini qo‘llab-quvvatlash zarurati bilan izohlandi.

Markaziy bank maʼlumotiga ko‘ra, yil boshidan buyon inflyatsiya o‘sishga moyil bo‘lgan: mart oyida umumiy inflyatsiya darajasi 10,3%, asosiy (bazovaya) inflyatsiya — 8,1% ni tashkil etdi. Shunga qaramasdan, aholi va biznes inflyatsion kutilmalari pasaygan bo‘lsa-da, hozirgi ko‘rsatkichlardan hali ham yuqori bo‘lib qolmoqda.

Hozirgi kunda ichki bozorda talab va taklif o‘rtasidagi disbalans, shuningdek, tashqi omillar inflyatsion bosimni kuchaytirmoqda. Bunda 2024 yilda amalga oshirilgan energonositalar narxlarini liberallashtirish taʼsiri 2025 yilning ikkinchi choragi oxirigacha tugashi va bu omil narxlarning oshish surʼatini sekinlashtirishi kutilmoqda.

Shu bilan birga, jahon iqtisodiyotidagi beqarorlik, narxlar va xarajatlarning o‘sishi inflyatsiyaga bosimni saqlab turmoqda.

Markaziy bank taxminiga ko‘ra, 2025 yil oxirigacha inflyatsiya darajasi 7–8% prognoz koridorining yuqori chegarasiga yaqinlashishi mumkin.

Iqtisodiy o‘sish joriy yilning birinchi choragida 6,8% ni tashkil etdi. Yil yakunida esa, isteʼmol, investitsiyalar va chet eldan kelayotgan pul o‘tkazmalari hisobiga, YAIM o‘sishi 6% atrofida bo‘lishi kutilmoqda.

Markaziy bank o‘rta muddatli istiqbolda inflyatsiyani 5% darajasiga tushirish maqsadida hozirgi qatʼiy pul-kredit siyosatini saqlab turishini maʼlum qildi.

Kelgusi yig‘ilish 2025 yil 12 iyunga belgilangan.