Toshkent, O‘zbekiston (UzDaily.uz) — 2025 yilning birinchi choragida O‘zbekiston Respublikasining asosiy kapitalga yo‘naltirilgan investitsiyalari hajmi 120,4 trln so‘mni tashkil etdi. Bu haqda Milliy statistika qo‘mitasi xabar berdi.

Ushbu mablag‘larning katta qismi xorijdan kelib tushgan bo‘lib, umumiy investitsiyalar hajmida to‘g‘ridan-to‘g‘ri xorijiy investitsiyalar va kreditlar ulushi 71%ni tashkil etdi.

Milliy statistika qo‘mitasining dastlabki maʼlumotlariga ko‘ra, O‘zbekistonda o‘zlashtirilgan xorijiy investitsiyalar tarkibida eng katta ulush Xitoyga to‘g‘ri kelib, jami mablag‘larning 33%ini taʼminlagan.

Ikkinchi o‘rinda Rossiya joylashgan — uning hissasi 10%ni tashkil etadi. Turkiya ham faol investitsiya kiritmoqda — 5,2% ulush bilan uchinchi o‘rinda.

Saudiya Arabistoni (4,7%) va Niderlandiya (3,7%) ham O‘zbekiston iqtisodiyotiga salmoqli investitsiyalar yo‘naltirgan.

Germaniya esa 3,3% ulush bilan mamlakat iqtisodiyoti rivojiga muhim hissa qo‘shmoqda.