Toshkent, O‘zbekiston (UzDaily.uz) — 7–8-yanvar kunlari O‘zbekistonning investitsiyalar, sanoat va savdo vaziri Laziz Qudratov Birlashgan Arab Amirliklari (BAA)ga tashrif buyurib, mamlakatning rasmiy shaxslari hamda yetakchi kompaniyalari vakillari bilan qator uchrashuvlar va muzokaralar o‘tkazdi.

Tashrif doirasida turli sohalarda ikki tomonlama hamkorlikni kengaytirish imkoniyatlari muhokama qilindi.

Asosiy e’tibor energetika, infratuzilmani rivojlantirish hamda sun’iy intellekt texnologiyalarini joriy etish sohalarida hamkorlikni kuchaytirish istiqbollariga qaratildi.

Shuningdek, qo‘shma investitsion loyihalar portfelini kengaytirish va O‘zbekiston bilan BAA o‘rtasidagi ikki tomonlama munosabatlarni mustahkamlashga qaratilgan boshqa dolzarb masalalar ham muhokama qilindi.

Vazirning tashrifi har ikki davlatning iqtisodiy va investitsion hamkorlikni yanada chuqurlashtirishga bo‘lgan intilishini namoyon etmoqda.