Toshkent, O‘zbekiston (UzDaily.uz) — Gruziya bosh vaziri Irakliy Kobaxidze boshchiligidagi delegatsiyaning rasmiy tashrifi doirasida O‘zbekiston Milliy olimpiya qo‘mitasi (MOQ) Bosh kotibi Oybek Qosimov va Gruziya sport vaziri Shalva Gogoladze o‘rtasida uchrashuv bo‘lib o‘tdi. Uchrashuvda O‘zbekiston Respublikasi sport vaziri o‘rinbosari Shahrullo Mahmudov ham ishtirok etdi.

Uchrashuvda sport sohasidagi ikki tomonlama hamkorlik yo‘nalishlari muhokama qilindi.

Tajriba almashish, sportchilarni tayyorlash va olimpiya harakatini rivojlantirishga qaratilgan qo‘shma loyihalar bo‘yicha muzokaralar olib borildi.

Xalqaro sport tadbirlari doirasida hamkorlik istiqbollari alohida eʼtiborga olindi.

Oybek Qosimov O‘zbekiston Gruziya bilan sport aloqalarini mustahkamlashdan manfaatdor ekanini taʼkidlab, bunday uchrashuvlar umumiy maqsadlarga erishishda muhim ahamiyatga ega ekanini qayd etdi. Shalva Gogoladze esa Gruziyaning sport infratuzilmasini rivojlantirish va sog‘lom turmush tarzini ommalashtirish tajribasi bilan o‘rtoqlashishga tayyorligini bildirdi.

Gruziya delegatsiyasining tashrifi nafaqat siyosiy va iqtisodiy, balki sport sohasidagi hamkorlikni mustahkamlashda muhim qadam bo‘ldi. Kelishuvlar har ikki davlat sport salohiyatining o‘sishi uchun yangi imkoniyatlar yaratishi kutilmoqda.