Toshkent, O‘zbekiston (UzDaily.uz) — O‘zbekiston fuqarosi, o‘ta yirik miqdorda o‘zlashtirish yoki talon-toroj qilishda ayblanib, xalqaro qidiruvda bo‘lgan shaxs Moskvadagi Vnukovo aeroportida qo‘lga olindi va vatanga ekstraditsiya qilindi. Bu haqda 15 may kuni Rossiya Ichki ishlar vazirligi matbuot xizmati xabar berdi.

Tergov maʼlumotlariga ko‘ra, ayblanuvchi shaxs xususiy kompaniya rahbari sifatida paxta yetishtirishni bahona qilib bankdan taxminan 9 million dollar miqdorida kredit olgan. Biroq qishloq xo‘jaligi mahsulotlarini sotishdan 20 million dollar atrofida foyda olgan bo‘lsa-da, qarzni qaytarmagan va mamlakatni tark etib, chet elga qochgan.

O‘zbekiston Interpoli milliy byurosi tomonidan ayblanuvchining Rossiyaga yetib kelish ehtimoli haqidagi maʼlumotdan so‘ng, u samolyot qo‘nishi bilanoq Vnukovo aeroportida qo‘lga olindi.

Shu kuniyoq u O‘zbekistonga ekstraditsiya qilindi va Toshkentdagi aeroportda mahalliy huquqni muhofaza qiluvchi organlarga topshirildi.