Toshkent, O‘zbekiston (UzDaily.uz) — O‘zbekistonlik grossmeyster Nodirbek Yaqubboyev Chexiyada o‘tkazilgan shaxmat festivali doirasidagi Challengers turnirida g‘alaba qozondi.

Festival doirasida uchta davriy turnir tashkil etildi:

Masters — musobaqaning asosiy turniri,

Challengers — Masters guruhiga yo‘llanma olish uchun saralash bosqichi,

Futures — g‘oliblari Challengers guruhida ishtirok etish imkoniyatiga ega bo‘lgan musobaqa.

Nodirbek Yaqubboyev musobaqada 5 ta g‘alaba qozondi va 4 ta durang qayd etdi, bironta mag‘lubiyatga uchramadi. U 9 ochkodan 7 tasini to‘pladi va shu natijani qayd etgan Daniyalik Yonas Byul Byerre bilan birinchi o‘rinni bo‘lishdi. Tay-breyk bahslaridagi muvaffaqiyatli o‘yin esa unga g‘oliblikni taʼminladi.

Ushbu g‘alaba Yaqubboyevga kelasi yil Masters guruhida ishtirok etish imkonini berdi. Shuningdek, u shaxsiy reytingini 2665ga yetkazib, eng yuqori ko‘rsatkichlaridan biriga yaqinlashdi.