Toshkent, O‘zbekiston (UzDaily.uz) — Navoiy shahrida davlat tilida menyu taqdim etmagan jamoat ovqatlanish muassasasiga nisbatan choralar ko‘rildi.

Shahar fuqarosi E.N. Navoiy viloyati Antimonopoliya qo‘mitasining hududiy boshqarmasiga murojaat qilib, “NAVOIY-SAXOVAT MANZILI” MCHJga qarashli restoranda isteʼmolchilar huquqlari buzilganini maʼlum qildi.

Tekshiruv davomida boshqarma mutaxassislari mazkur muassasada korxona nomi, soliq to‘lovchining identifikatsion raqami (STIR) va maʼlumotlarni skaner qilish uchun maxsus QR-kod mavjud emasligini aniqladilar. Shuningdek, ish rejimi haqidagi maʼlumot, narx belgilari va davlat tilidagi taomlar ro‘yxati ham joylashtirilmagan edi.

Tekshiruv natijalariga ko‘ra, hududiy boshqarmaning Maxsus komissiyasi tomonidan “NAVOIY-SAXOVAT MANZILI” MCHJga nisbatan ish qo‘zg‘atilib, Isteʼmolchilar huquqlarini himoya qilish to‘g‘risidagi qonun va jamoat ovqatlanishi sohasida xizmat ko‘rsatish tartibini tartibga soluvchi Vazirlar Mahkamasining 75-sonli qarori talablarining buzilganligi aniqlandi.

Shuningdek, korxona masʼul xodimiga nisbatan maʼmuriy bayonnoma tuzilib, ko‘rib chiqish uchun sudga yuborildi.