Toshkent, O‘zbekiston (UzDaily.uz) — Turizm qo‘mitasida xalqaro tajribaga bag‘ishlangan ekspertlik davra suhbati bo‘lib o‘tdi. Unda tog‘-chang‘i kurortlarini yaratish va boshqarish sohasidagi yetakchi mutaxassislar, davlat idoralari, xususiy biznes va turizm sektori vakillari ishtirok etdi.

Tadbirni Turizm qo‘mitasi raisi Umid Shadiyev ochib berdi. U o‘z nutqida tog‘-chang‘i kurortlarini rivojlantirish mamlakatning turistik salohiyatini oshirish, to‘g‘ridan-to‘g‘ri xorijiy investitsiyalar oqimini taʼminlash va O‘zbekistonning jahon turizm xaritasidagi o‘rnini mustahkamlashdagi strategik ahamiyatini taʼkidladi.

Tadbirning asosiy spikeri — Fransiyaning Societe de Trois Vallees SA kompaniyasi prezidenti Paskal de Tyersan bo‘ldi. U premium toifadagi kurortlarni tashkil etish bo‘yicha yetakchi tajribalari bilan o‘rtoqlashdi. Ushbu doirada mashhur Kurshevel kurorti muvaffaqiyatli loyiha sifatida namoyish etildi va zamonaviy tog‘-chang‘i turizmi uchun namuna sifatida qayd etildi.

Davra suhbatida O‘zbekiston mintaqalarida tog‘-chang‘i klasterlarini rivojlantirish istiqbollari alohida eʼtiborga olindi. Sessiya doirasida amalga oshirilayotgan tashabbuslar, xalqaro sayyohlarni jalb etish va yuqori sifatli servis yaratishga qaratilgan infratuzilmani shakllantirish bo‘yicha uzoq muddatli rejalar taqdim etildi.

Tadbir B2B va B2G formatlaridagi ishbilarmon muzokaralar bilan yakunlandi. Tomonlar potensial loyihalar va hamkorlik mexanizmlarini muhokama qildi.