Toshkent, O‘zbekiston (UzDaily.uz) — Andijon viloyatida joylashgan "Ipak yo‘li" erkin iqtisodiy zonasida (EIZ) ikki yirik loyiha ishga tushirildi.

Dastlab, $10 millionlik loyiha doirasida elektr skuterlar ishlab chiqarish yo‘lga qo‘yiladi. Loyihaga ko‘ra, yiliga 2 million dona elektr skuter ishlab chiqarilishi va $5 millionlik mahsulot eksport qilinishi rejalashtirilgan. Ishlab chiqarish 2025 yil oxirida boshlanishi kutilmoqda.

Shuningdek, Xitoyning China Baoli Technologies Holdings Limited kompaniyasi tomonidan rangli metall konstruksiyalar ishlab chiqarish zavodi qurilishi boshlandi. Ushbu loyiha qiymati $200 millionni tashkil etadi. Zavodning yillik quvvati 45 ming tonna mahsulot ishlab chiqarishga mo‘ljallangan bo‘lib, eksport salohiyati $18 millionni tashkil etadi. Zavod 2026 yilda ishga tushishi rejalashtirilgan.

2024 yil fevral oyida Prezident Shavkat Mirziyoyev "Ipak yo‘li" EIZni tashkil etish haqida e’lon qilgan edi. Xitoylik investorlar ishtirokida tashkil etilgan ushbu hududda energetika, mashinasozlik, tekstil va qishloq xo‘jaligi sohalarida jami $3 milliardlik 30 dan ortiq loyihalarni amalga oshirish rejalashtirilgan.

EIZning umumiy maydoni 218 gektarni tashkil qiladi. Shu jumladan, 201 gektardan ortiq yer maydonlari qishloq xo‘jaligidan sanoat, transport, aloqa, mudofaa va boshqa maqsadlarga o‘tkazilgan.