Toshkent, O‘zbekiston (UzDaily.uz) — Rasmiy tashrif bilan O‘zbekistonda bo‘lib turgan Gruziya Bosh vaziri Irakliy Kobaxidze Toshkentdagi Texnoparkka tashrif buyurdi. Unga O‘zbekiston Bosh vaziri Abdulla Aripov hamrohlik qildi.

Ushbu innovatsion kompleks Prezident Shavkat Mirziyoyev tashabbusi bilan tashkil etilgan bo‘lib, sanoat kooperatsiyasini rivojlantirish va yuqori texnologiyali mahsulotlar ishlab chiqarish uchun muhim maydon hisoblanadi. Loyihaga 365 million dollardan ortiq to‘g‘ridan-to‘g‘ri investitsiyalar jalb qilingan. Hozirda Texnopark hududida 16 ta zamonaviy ishlab chiqarish maydoni faoliyat ko‘rsatmoqda.

Tashrif davomida Irakliy Kobaxidze Texnopark korxonalarida ishlab chiqarilayotgan mahsulotlar bilan tanishdi. Mehmonga keng turdagi yuqori texnologiyali mahsulotlar – maishiy texnika, elektron hisoblagichlar, liftlar, suv nasoslari, sanoat konditsionerlari, muzlatgich uskunalari va boshqa mahsulotlar namoyish etildi.