Toshkent, O‘zbekiston (UzDaily.uz) — Davlat aktivlarini boshqarish agentligi (DAB) «Avtooyna» kompaniyasining 100% aksiyalarini sotib olish bo‘yicha arizalar qabul qilish muddatining uzaytirilganini e’lon qildi.

Sentyabr oyida to‘rtta da’vogar arizalar topshirgan bo‘lib, ular majburiy takliflarni taqdim etish uchun qabul qilingan. Ammo ulardan ikki nafari hujjatlarni belgilangan muddatgacha topshirishga ulgurgan, lekin ular tomonidan taklif etilgan narx aktivning taxminiy qiymatidan past bo‘lgan.

Xususiylashtirish jarayonida raqobat muhitini ta’minlash maqsadida DAB arizalarni qabul qilishning yangi muddatini 2025-yil 20-yanvargacha belgiladi.

«Avtooyna» kompaniyasi turli xil o‘lchamdagi avtomobil oynalari (150 dan ortiq tur) ishlab chiqarish bilan shug‘ullanadi va yillik ishlab chiqarish quvvati 420 ming donadan ortiq mahsulotni tashkil etadi. Korxona Bystronic Glass (Shveysariya), Cugher, Ctriulzi, Mario Argiro, Kera Glass (Italiya), Glassrobots, Pilkington (Finlyandiya) va Vetrotool (Ispaniya) kabi mashhur xalqaro brendlarning texnologiyalaridan foydalanadi.

2024-yil iyul oyida «Avtooyna» va Uz-Koram kompaniyalarining 100% aksiyalarini xususiylashtirish jarayoni boshlangan edi. Ilk bor aktivga qiziqish bildirish bo‘yicha arizalarni qabul qilish muddati 27-avgustgacha etib belgilangan, lekin potensial investorlarning murojaatlari tufayli muddat 4-sentyabrgacha uzaytirilgan edi.