Toshkent, O‘zbekiston (UzDaily.uz) — Xitoyning BYD avtomobili kompaniyasi 2024-yilda yangi energiya manbalaridagi avtomobillar (NEV) savdosi 41,26% ga o‘sganini va 4,27 milliondan ortiq transport vositalari sotilganini ma’lum qildi. Bu haqda kompaniya Shenchjen fond birjasidagi bayonotida ma’lum qildi.

Savdolarning asosiy qismini yo‘lovchi avtomobillar tashkil etgan bo‘lib, ular 4,25 million donani tashkil etdi. Bu ko‘rsatkich 2023-yilga nisbatan 41,07% ga oshgan.

Shulardan to‘liq elektr avtomobillari 1,76 million donadan ortiq bo‘lib, 12,08% ga o‘sgan, gibrid avtomobillar esa 72,83% ga oshib, 2,49 million donaga yetgan.

Bundan tashqari, BYD kompaniyasining xalqaro bozorlardagi yo‘lovchi NEV savdosi 71,9% ga oshib, 417 200 donani tashkil etgan. Bu kompaniyaning xalqaro bozorlardagi ishtirokini kengaytirishga qaratilgan sa’y-harakatlarini tasdiqlaydi.

BYD Xitoydagi eng yirik avtomobil ishlab chiqaruvchisi sifatida ekologik texnologiyalarga o‘tish jarayonida katta o‘sish kuzatilayotgan kompaniyalardan biri hisoblanadi.

Xitoy avtomobil ishlab chiqaruvchilar assotsiatsiyasi ma’lumotlariga ko‘ra, 2024-yilning dastlabki 11 oyida Xitoy avtoproizvoditellari 11,26 million NEV sotishgan, bu o‘tgan yilga nisbatan 35,6% ga ko‘p.

Global iqlim o‘zgarishiga qarshi kurash sharoitida NEV transport sektorida uglerod chiqindilarini kamaytirishda muhim rol o‘ynaydi. Xalqaro energiya agentligi ma’lumotlariga ko‘ra, uglerod neytralligiga erishish uchun 2030-yilga kelib dunyo bo‘ylab NEV savdosi 45 million donaga yetishi kerak.