Toshkent, O‘zbekiston (UzDaily.uz) — 11-dekabr kuni Syurixda bo‘lib o‘tgan navbatdan tashqari FIFA kongressida 2030 va 2034-yillarda futbol bo‘yicha Jahon chempionati mezbonlari aniqlandi.

2030 yilgi Jahon chempionatining asosiy mezbonlari sifatida Ispaniya, Portugaliya va Marokash belgilandi. Shuningdek, turnirning ayrim uchrashuvlari Janubiy Amerika davlatlari — Argentina, Paragvay va Urugvayda o‘tkaziladi.

2034 yilgi Jahon chempionati esa Saudiya Arabistonida o‘tkaziladi. Saudiya Arabistoni turnirni o‘tkazish uchun yagona nomzod bo‘lgan. Yozgi haroratning yuqori bo‘lishi sababli chempionat qish faslida o‘tkaziladi.

Eslatib o‘tamiz, 2026 yilgi futbol bo‘yicha Jahon chempionati AQSH, Kanada va Meksikada o‘tkaziladi. Yevropa saralash turnirining qur’asi 13-dekabr kuni o‘tkaziladi.