Toshkent, O‘zbekiston (UzDaily.uz) — 2025-yilda Toshkent shahridagi «Paxtakor» stadionini rekonstruksiya qilish ishlari boshlanishi rejalashtirilgan. Bu haqda futbol klubining raisi Jahongir Ortiqxo‘jayev ma’lum qildi.

Uning so‘zlariga ko‘ra, ishlar yakunlanganidan so‘ng stadion to‘liq Xalqaro futbol federatsiyasi (FIFA) talablariga mos keladigan darajaga keltiriladi.

«Paxtakor» stadioni 1954–1956-yillarda me’mor Mitxat Sagatdinovich Bulatov rahbarligida qurilgan. Dastlab stadionning sig‘imi 55 ming tomoshabinni tashkil qilgan edi. Biroq, 1996, 2008 va 2012-yillardagi rekonstruksiya ishlaridan so‘ng, uning sig‘imi 35 ming o‘ringa qisqartirilgan.

Yangi rekonstruksiya jarayoni stadion infratuzilmasini zamonaviylashtirish, muxlislar uchun qulayliklarni oshirish hamda xalqaro standartlarga moslashtirishni maqsad qilgan bo‘lib, u yuqori darajadagi o‘yinlarni o‘tkazishga imkoniyat yaratadi.