Toshkent, O‘zbekiston (UzDaily.uz) — O‘zbekistonning yirik shaharlarida ekologik xavf tug‘diradigan yangi korxonalar faoliyati to‘xtatiladi. Bu cheklov 2025 yil Davlat dasturini amalga oshirishga qaratilgan prezident farmonida belgilangan.

Hujjatga ko‘ra, 1 maydan boshlab asbest va sement, shlam va shlak ishlab chiqarish, teri va parrandachilik fabrikalari faoliyatiga taqiq joriy etiladi. Shuningdek, zamonaviy chang va gaz tozalash tizimlari bilan jihozlanmagan korxonalarda ko‘mir yoqish, qora va rangli metallurgiya zavodlari, zaharli qo‘shimchalar va kimyoviy moddalardan foydalanadigan shisha ishlab chiqarish korxonalari, hamda I va II toifadagi xavfli chiqindilarni qayta ishlash va yoqish obyektlarining faoliyati cheklanadi.

Bundan tashqari, 1 oktyabrgacha Vazirlar Mahkamasi Toshkent, Nukus va viloyat markazlaridan cheklov qo‘llanilgan korxonalar hamda yuqori energiya isteʼmoliga ega sanoat obyektlarini bosqichma-bosqich olib chiqish bo‘yicha takliflar taqdim etadi.

2025 yilgi dasturda shuningdek, 1 maydan boshlab Toshkent, Nukus va viloyat markazlarida atmosferaga zarar yetkazishi mumkin bo‘lgan yangi loyihalar uchun ekologik xulosa berishni to‘xtatish nazarda tutilgan.

Ekologiya, atrof-muhitni muhofaza qilish va iqlim o‘zgarishi vazirligining maʼlumotlariga ko‘ra, yangi ekologik xavfli korxonalar qurilishini cheklash va mavjud 168 ta ishlab chiqarishni bosqichma-bosqich ko‘chirish hududlarning ekologik barqarorligini mustahkamlashga yordam beradi.

Shu bilan birga, sanoat hududlarida yangi ish o‘rinlari yaratiladi va transport yo‘nalishlari, elektr, gaz va suv taʼminoti tizimlari kabi zarur infratuzilma rivojlantiriladi. Chang va gaz tozalash tizimlari bilan jihozlanmagan korxonalarning yopilishi atmosferaga zararli chiqindilar hajmini keskin kamaytiradi.

Bundan tashqari, ko‘mirdan foydalanadigan barcha korxonalarda zamonaviy chang-gaz tozalash tizimlari o‘rnatiladi. Sanoat chiqindilarini qayta ishlash dasturlari joriy etilib, ulardan qurilish materiallari ishlab chiqarishda foydalaniladi. Parrandachilik fabrikalarida bioenergetika texnologiyalari rivojlantiriladi, teri zavodlari uchun oqova suvlarni tozalash tizimlari tashkil etiladi.